Novitads

Glion – Marcau european dalla Reformaziun

Tgi che va oz tras las gassas da Glion, igl emprem marcau sper il Rein, sa strusch s'imaginar ch'igl ei inaga vegniu scret gronda historia a Glion e ch'il marcau ha giu ina gronda funcziun sco center dallas Treis Ligias. Ils davos onns ei il vargau e la historia dil marcauet vegnius elavuraus da pliras varts a moda e maniera fetg interessanta e porscha uss als indigens ed era als hosps ina preziusa envesta da gliez temps.

Da gliez temps avon 500 onns

Igl onn 2015 ei Glion vegnius undraus cun il tetel da honur "Marcau european dalla Reformaziun" ed ha festivau quei cun differentas activitads.

La distincziun meina anavos egl onn turbulent 1526. Da gliez temps ha il "Bundstag" citau Johannes Comander, il spiritual da Cuera, ses simpatisants e representants dils "ault cartents" a Glion tier in discuors da cardientscha. La disputaziun ei vegnida ordinada, suenter ch'ei ha dau in plogn encunter Comander e 40 ulteriurs spirituals, pervia ch'els hagien giu publicau "tesas encunter la baselgia catolica".  Duront igl unviern ein spirituals digl entir Grischun marschai sur ils pass tochen a Glion. Il discuors da debatta ha aschia giu liug naven dils 7 entochen ils 9 da schaner 1526.

Las tesas illegalas da Comander, stampadas ad Augsburg, formavan la basa dil discuors. Il reformatur e ses simpatisants ein malgrad las pretensiuns buca vegni sentenziai, quei che ha muntau in triumf indirect dils reformaturs. Sinaquei ein las tesas da Comander vegnidas sederesadas vinavon ed han tschentau entras quei la basa teologica dalla Reformaziun Grischuna, che ha da gliez temps procurau per attenziun entochen la Tiara Tudestga dil sid.

Guidas tier la Reformaziun

Per cumpletar la purschida dil Marcau european dalla Reformaziun Glion ein ils guids da cultura sefatschentai intensivamein cul tema Reformaziun el cantun Grischun e specialmein cun la Reformaziun el marcau da Glion. Ussa porschan els turas tier ils loghens d'acziun originals d'avon 500 onns. Gia uss ein numerusas pleivs s'annunziadas per ina tura questa stad ni igl atun, che vulan aschia passentar cun lur commembers in interessant di a Glion cun visitar l'exposiziun, guder in bien gentar ed udir historia(s) tier la Reformaziun. Ils refoGuides Alex Schaub e Marco Curti vegnan a menar las turas, la plevonessa Maria Wüthrich ei sepreperada en special per turas cun classas da scola. Nus sperein ch'il giubileum dalla Reformaziun sveglia grond interess e daventa in success turistic.
Tier las guidas...

Occurrenzas han schau reviver il temps dalla Reformaziun

Per la survesta historica
Intervegni dapli davart la historia dalla Reformaziun – tier las occurrenzas

Savida fundada historica da Glion sco marcau da reformas impurtontas