Novitads

Intenziun dad introducir ina procedura da planisaziun da quartier pertuccont igl areal "Center staziun (adattaziun 2020) " a Glion

A caschun dalla sesida digl 1. da settember 2020 ha la suprastonza communala da Ilanz/Glion decidiu dad instradar ina procedura da planisaziun per il plan da quartier "Center staziun (adattaziun 2020)" sebasond sin artechel 16 dalla ordinaziun davart la planisaziun dil territori per il cantun Grischun.

Il plan da quartier "Center staziun" corrispunda en entgins puncts (denter auter la direcziun da carrar dils autos da posta) buca pli als basegns dil traffic public. En special eis ei da far entginas precisiuns pertuccont las cundiziuns existentas. Ultra da quei eis ei previu da remplazzar il baghetg dalla staziun. Cheutier vegn actualmein fatg ina concurrenza d'architectura. Sin fundament dalla concurrenza eis ei gia veseivel, ch'ei drova adattaziuns vid il plan da quartier. Ord quei motiv ha la suprastonza communala l'intenziun da midar il plan da quartier dil "Center staziun".

Il perimeter da terren dil plan da quartier ei veseivels sil plan da situaziun 1:1000 plan da quartier "Center staziun (midada 2020)".Quel ei exponius naven dils 11 da settember 2020 entochen ils 12 d'october 2020 (30 dis) ella Casa Cumin a Glion, ella 3. alzada tier la partiziun infrastructura, naven da gliendisdis entochen venderdis dallas 08.30 - 11.30 e dallas 13.30 - 17.00.

Encunter l'introducziun dalla procedura da planisaziun da quartier ed il perimeter pertuccau san ins far protesta a scret e cun indicar la motivaziun tier la suprastonza communala entochen ils 12 d'october 2020.

Glion, ils 11 da settember 2020                     Suprastonza communala Ilanz/Glion