Novitads

Introducziun Parkingpay a Glion

La vischnaunca dad Ilanz/Glion introducescha sin ils parcadis publics a Glion in niev sistem da pagar. Quel lubescha la colligiaziun cun treis differentas applicaziuns. La pli derasada applicaziun en Svizra ei Parkingpay. Plinavon eis ei pusseivel da duvrar l'applicaziun TWINT sco era Easypark che vegn duvrada en 13 tiaras dall'Europa.

Naven digl 1. d'october 2019 san las taxas per ils parcadis publics da Glion era vegnir pagadas senza muneida. Cun il Parkingpay tschenta Ilanz/Glion a disposiziun il pli derasau sistem en Svizra ch'ei gia en funcziun en rodund 400 marcaus e vischnauncas. Cun il niev sistem san ins era retrer las differentas vignettas da parcar annualas e mensilas. In'annunzia sut www.parkingpay.ch ei necessaria. Sper Parkingpay stat era l'applicaziun Easypark che vegn duvrada en pliras tiaras europeicas a disposizun. Taxas per ils parcadis marcai alv san era vegnir pagadas cun l'applicaziun TWINT. Las uras da parcar ed ils automats da bigliets vegnan marcai cun in taccader. Per quella metoda da pagament sto la numera d'auto vegnir registrada l'emprema gada.

Secapescha san ins vinavon pagar vid las uras da parcar ed ils automats da bigliets cun muneida. Las vignettas da parcar annualas ni mensilas san vinavon vegnir retratgas persunalmein tier la controlla da habitonts Ilanz/Glion.

Glion, ils 13 da settember 2019 Vischnaunca Ilanz/Glion