Novitads

Lavurs agricolas da gis da ruaus locals e publics

Sco gis da ruaus publics valan las dumengias, ils firaus sco era ils gis da ruaus locals tenor art. 23 dalla lescha da polizia dalla vischnaunca Ilanz/Glion. Sebasond sin art. 4 dalla lescha cantunala davart ils gis da paus publics ein tuttas activitads che disturban il ruaus e la dignitad adequata da quest gi ni il survetsch divin ni che offendan ils sentiments religius d'autras persunas scumandadas quels gis. Lavurs agricolas ein lubidas sulettamein sch’il prighel exista che la raccolta vegn svaletada ni ruinada pervia da macort'aura. Deplorablamein havein survegniu differentas reclamaziuns pervia da lavurs agricolas las dumengias. Ultra da quei havein intervegniu ch’ei vegn entschiet cun lavurs agricolas memia baul la damaun ni era tard la sera. Cun las lavurs astga buca vegnir entschiet avon las 07.00 (temps da ruaus general). Nus supplichein perquei instantamein da respectar las prescripziuns legalas ed engraziein per la capientscha. Cass cuntrari vegnan surpassaments dallas prescripziuns communalas castigiai cun ina multa disciplinara.


Direcziun communala Ilanz/Glion