Novitads

Sboz maletg empalont dil territori communal MTC dalla vischnaunca dad Ilanz/Glion

Ils 9 da fevrer 2020 han ils habitonts dalla vischnaunca dad Ilanz/Glion approbau la reuniun dalla planisaziun locala e la harmonisaziun dalla lescha da baghegiar. Ussa quentan las medemas reglas e basas en tut las fracziuns.

Suenter quei pass ei ina vasta sintesa sur quei niev territori, che s'extenda denter il lag da fermada da Pigniu e las alps da Duvin e tonscha naven dalla Ruinaulta tochen il Péz Fèss, aunc aviarta. Quella sintesa duei uss vegnir risguardada cun il maletg empalont dil territori communal.

La cumpilaziun dil maletg empalont dil territori communal ei in'obligaziun, ch'ei surdada allas vischnauncas el Grischun tras il plan directiv dil cantun. Ultra da quei ei il contuorn da planisaziun semidaus ils davos onns cun las mesiras encunter la destructuraziun e las restricziuns muort la lescha da secundas habitaziuns. Aschia ha il maletg empalont era da prender posiziun tier il basegns dalla surfatscha da habitadis e tier la reducziun dallas zonas da baghegiar memia grondas ella vischnaunca dad Ilanz/Glion.

Il maletg empalont ei era in invit ed ina schanza da sefatschentar cun igl agen ambient da viver e da crear potenzials custeivels per il futur. Quella devisa duei formar il maletg empalont dil territori communal dalla vischnaunca dad Ilanz/Glion e perquei duein treis finamiras star el center e caracterisar il maletg empalont:

- Il maletg empalont dil territori communal duei mussar si las vastas fassettas dallas 13 fracziuns sco era ils elements d'identitad da nos vitgs e cunquei rinforzar nies plascher vid quella cultura da baghegiar (analisa dils maletgs da vitg);

- Cun il maletg empalont duei sesarver perspectivas e vegnir dau impuls, sco novas ideas ed actuals basegns duein vegnir realisai sut igl aspect dad in svilup qualitativ endadens ed ina renovaziun digl existent (tesas en fuorma da projects directivs);

- Il maletg empalont furnescha instrucziuns d'agir per saver co in tal svilup digl habitadi sa vegnir realisaus concretamein. Las instrucziuns ein adressadas allas vischnauncas, denton era a patruns da construcziun e proprietaris da terren interessai.

Nus envidein Vus cordialmein da sefatschentar cun il maletg empalont dil territori communal e cunquei era il svilup da Vies ambient da viver e da Vossa patria. Vus haveis la caschun da vegnir introduci en quella tematica duront l'occurrenza d'informaziun e da separticipar activamein all'exposiziun cun Vossas ideas ed argumentaziuns. Nus selegrein, sche Vus separticipeis alla formaziun da quei territori.

Actas d'exposiziun: rapport maletg empalont dil territori communal

Agenda

Occurrenza d'informaziun publica
Vendergis, ils 18 da settember 2020 allas 20.00, casa da scola Glion, halla da gimnastica 3

Exposiziun: Center Mundaun, Glennerstrasse 30, Glion (vegl Migros, entrada laterala)
Temps d'avertura:


settember:
- gliendisgis, ils 21 da settember 2020, 9.00 - 11.00
- mesjamna, ils 23 da settember 2020, 13.00 - 15.00
- margis, ils 29 da settember 2020, 14.00 - 16.00

october:
- gievgia, igl 1. d'october 2020, 15.00 - 17.00
- vendergis, ils 2 d'october 2020, 10.00 - 12.00
- gliendisgis, ils 5 d'october 2020, 10.00 - 12.00
- mesjamna, ils 7 d'october 2020, 13.00 - 15.00
- vendergis, ils 9 d'october 2020, 15.00 - 17.00
- gliendisgis, ils 12 d'october 2020, 16.00 - 18.00
- mesjamna, ils 14 d'october 2020, 14.00 - 16.00
- margis, ils 20 d'october 2020, 9.00 - 11.00
- gievgia, ils 22 d'october, 15.00 - 17.00
- vendergis, ils 23 d'october 2020, 14.00 - 16.00
- margis, ils 27 d'october 2020, 9.00 - 11.00
- mesjamna, ils 28 d'october 2020, 14.00 - 16.00
- vendergis, ils 30 d'october 2020, 15.00 - 17.00

Termins ateliers ellas localitads d'exposiziun
Duront quei temps han quater ateliers publics liug el Center Mundaun, en ils quals vegn il maletg empalont dil territori communal discussiunaus ord puncts da vesta specifics ed ei vegn priu encunter propostas. Envidai ein tut quels che han interess vid il maletg empalont dil territori communal e quels temas.

Il maletg empalont ord vesta:
- dils architects, planisaders, administraturs d'immobilias, margis, ils 29 da settember 2020, 19.00 - 21.00

- dalla giuventetgna, gievgia, igl 1. d'october 2020, 19.00 - 21.00

- dallas dunnas, sonda, ils 3 d'october 2020, 9.00 - 11.00

- dil turissem, commerci, economia da construcziun ed agricultura,
gliendisgis, ils 5 d'october 2020, 19.00 - 21.00

Cuntegn ateliers:

1. Architects, planisaders, administraturs d'immobilias
Lectura dil liug cun igl exempel Ruschein/Ladir
Il vitg vit - braha ni potenzial
Co sa il maletg empalont dil territori communal vegnir duvraus sco impuls e cudez?

2. Giuventetgna
Lectura dil liug
Nova veta en casas communalas Vitas
Spazi public ord vesta dalla giuventetgna

3. Dunnas
Lectura dil liug
Fuormas da viver - oz e damaun
Umens planiseschan per dunnas - tgei fagessan las dunnas auter?

4. Turissem, commerci, economia da construcziun e d'agricultura
Lecutra dil liug
Via Glion - ina schanza per tuts
Visiun tetg sur la Via Alp Su - Glion vegn sper il Rhein

Las mesiras da protecziun en connex cun corona vegnan risguardadas ellas localitads d'occurrenza. Nus supplichein Vus da s'annunziar per ils ateliers per mail (info@ilanz-glion.ch) ni per telefon (081 920 15 66) entochen mintgamai in gi avon il termin dall'occurrenza. Ella stanza d'exposiziun vegn deponiu ina gliesta da preschientscha.

Sche Vus anfleis negin temps per visitar l'exposiziun duront ils temps d'avertura publics ni sche Vus giavischeis in termin specialmein per Vossa gruppa/biro etc., supplichein nus Vus da s'annunziar per telefon (081 920 15 66). Nus stein bugen a Vossa disposiziun.

Cooperaziun publica
Naven dils 21 da settember 2020 entochen ils 30 d'october 2020 sesanfla il rapport dil maletg empalont dil territori communal ella Casa Cumin a Glion, ella 3. alzada (gliendisgis tochen vendergis, 08.30 - 11.30 e 13.30 - 17.00). En quei temps san ins far propostas ed objecziuns pertuccont il maletg empalont en scret alla suprastonza communala.

Nus selegrein sin ina participaziun interessanta ed engraziein gia el num da nies futur.


Vischnaunca dad Ilanz/Glion               18 da settember 2020