Novitads

Scola Ilanz/Glion

Gliendisdis, ils 19 d’uost 2019 entschevin nus igl onn da scola 2019/20. Nus selegrein gia oz sin l’entschatta da scola, la quala succeda els singuls loghens sco suonda:

Glion – scoletta e scalem primar
Allas 09.00 serimnan tut ils affons en lur stanzas da scola/scoletta. L’entschatta ufficiala digl onn da scola succeda alllas 11.00 sil plaz pausa dalla scola primara. A quell’entschatta envidein nus cordialmein tut ils geniturs ed interessents. L’instrucziun tenor urari succeda naven dil suentermiezdi.

Glion – scalem superiur
Las scolaras ed ils scolars dil scalem superiur s’entaupan allas 08.00 en l’aula dalla casa da scola (tract B). Da niev ei il scalem superiur da Rueun integraus a Glion. Suenter in cuort beinvegni succeda l’instrucziun igl avonmiezdi tier il scolast/la scolasta da classa. Il suentermiezdi vegn instruiu tenor urari.

Castrisch e Sevgein – scoletta e scalem primar
Igl onn da scola niev entscheiva pils scolars allas 08.00 a Sevgein (nus serimnein sper la halla da gimnastica). Las scolaras ed ils scolars da Castrisch/Luven/Riein arrivan cullas postas da temps usitau.
Allas 9.00 ha il survetsch divin ecumen en baselgia liug per affons, geniturs ed interessai. Silsuenter serimnein nus en halla a Sevgein ad in brunch, per il qual mintga famiglia contribuescha enzatgei.
Suenter las 10.45 serendan scolarets e scolarAs dalla 1.-4. classa en lur stanzas da scola.
Scolaras e scolars dalla 5. e 6. classa segidan ensemen cun ils geniturs da far uorden ed astgan silsuenter ir a casa.

Duvin – scalem primar
Entschatta allas 08.00 cun in ensolver communabel. Scolaras e scolars, geniturs, persunas d’instrucziun e pedelas prendan part a quel. Silsuenter dat ei informaziuns generalas pertuccont igl onn da scola.

Rueun – scoletta e scalem primar
Survetsch divin communabel allas 08.00 (rimnada allas 07.55). Geniturs, parents ed enconuschents ein cordialmein beinvegni. Silsuenter entscheiva l’instrucziun tier las scolastas ni ils scolasts da classa.

Ruschein – scoletta e scalem primar
Nus entschevin igl onn da scola cun scolaras, scolars e tut ils interessai allas 08.30 en baselgia a Ruschein (rimnada direct en baselgia). Nus selegrein, d’astgar beneventar biars carschi al survetsch divin. Suenter messa vegn purschiu in pign refrestg avon scola. Ils geniturs dils scolarets sco era quels dalla scola pintga ein cordialmein envidai d’accumpignar lur affons en classa. Silsuenter entscheiva l’instrucziun tenor urari.

Plan da vacanzas 2019/20
entschatta digl onn da scola, ils 19 d’uost 2019
vacanzas d‘atun: 7 – 18-10-2019
vacanzas da Nadal: 23-12-2019 – 03-01-2020
vacanzas da sport: 24 – 28-02-2020
vacanzas da primavera: 20-04 – 01-05-2020
finiziun digl onn da scola: venderdis, ils 26 da zercladur 2020
Firaus e dis libers tenor il plan da vacanzas sin la pagina d’internet www.scola-glion.ch

Per damondas en connex cun transports ni cul menaschi da scola stat il secretariat (081 925 28 29 ni schuleilanz-glionch) bugen a disposiziun.

Nus giavischein a tuts gia oz ina bun’entschatta.


Team da scola Ilanz/Glion