Novitads

Elecziuns communalas dils 21-05-2017 – candidaturas per l’elecziun en in’autoritad communala

Ils 21 da matg 2017 han liug las elecziuns communalas per la secunda legislatura che cuozza naven digl 1-1-2018 entochen ils 31-12-2021. D'eleger ein il parlament communal, la suprastonza communala sco era il presidi communal.

Per l'elecziun dil parlament ella secunda legislatura disponan las vischnauncas oriundas tenor art. 60 al. 3 dalla Constituziun communala d'in dretg da proposta. Quel vegn exequius a caschun d'ina radunonza da fracziun ch'in commember dil parlament da quella fracziun convochescha.

Secapescha che tuttas persunas elegiblas ord la vischnaunca Ilanz/Glion han il dretg da proponer sesez per in mandat el parlament communal, ella suprastonza communala ni per il presidi communal. Candidaturas respectivas ein d'inoltrar a scret e cun indicar las persunalias sco era il liug da dimora sil pli tard entochen ils 14 d'avrel 2017 alla Suprastonza communala Ilanz/Glion, Plazza Cumin 9, 7130 Glion.

Per ulteriurs sclariments stattan la presidenta dil parlament Ursula Brändli Capaul, tel. 081 925 20 50 sco era il president communal Aurelio Casanova, tel. 081 920 15 15 a disposiziun.


Glion, ils 10 da fevrer 2017            Biro parlamentar Ilanz/Glion