Novitads

Scuviera il marcauet da Refo

Il marcau dalla Reformaziun Glion ei promts per ses hosps

Il marcau dalla Reformaziun Glion ha cumpletau il program d'occurrenzas per las festivitads da 500 onns cun ina purschida per scuvriders. Ina tura tras il marcau vegl cun 20 tablas tier baghetgs historics ed in prospect original envidan a perscrutar il marcauet ier ed oz.

En cooperaziun culla artista ed illustradra da Glion Yvonne Gienal (foto) eisi reussiu dad elavurar in prospect en fuorma d'in plan dil marcau vegl che plidentescha era famiglias e motivescha da far la tura.

En collaboraziun cul Museum Regiunal Surselva ein las tablas d'informaziun existentas vid ils baghetgs historics vegnidas remplazzadas entras novas inscripziuns per tudestg e romontsch. Il prospect "Entdecke das Refo-Städtli" meina tier staziuns sco per exempel la Gassa Steffan Gabriel, sperasvi tier la Ringmauer e lu tier la baselgia S. Margareta, nua ch'ils discuors da cardientscha dils da Glion han giu liug anno 1526. Tier tut quei vegn communicau l'impurtonza dalla valeta da Glion al temps dalla Reformaziun, sco era tematisau il viver ensemen dallas confessiuns el decuors dils tschentaners.

Ils prospects ein d’anflar tier las entradas dil marcau vegl, tier Surselva Tourismus alla staziun e tier l'entrada dalla Casa Cumin.


Nus giavischein bien divertiment da scuvierer il marcauet da Refo Glion!