Novitads
Plans da fuigia en cass d'alarm d'aua

Sebasond sin la Lescha federala davart ils implonts da fermada (CS 721.101) e l'Ordinaziun davart ils implonts da fermada dalla Confederaziun (CS 721.101.1) ston Confederaziun, Cantun e vischnauncas preparar instrucziuns per la populaziun co secuntener e per l'eventuala evacuaziun en cass ch'in mir da fermada rumpess.

Igl ei buca d'excluder che mirs da fermada vegnan donnegiai entras eveniments extraordinaris sco bovas, auas grondas, tiaratriembels, sabotaschas ni schizun conflicts armai e che gronds territoris vegnan per consequenza inundai. Experts valeteschan il prighel ch'in mir da fermada rumpi denton da principi sco fetg pigns.

Ils plans da fuigia en cass d’alarm d’aua actuals e cun cuntegn correct sco era ils plans dils loghens periclitai stattan a disposiziun. Els procuran per ina survesta co la populaziun ha da secuntener en in cass d’alarm d’aua. Quels muossan alla populaziun nua ch’ils locals da spetga definai dalla vischnaunca sesanfla en cass d’urgenza.

Il plaun dalla val dalla vischnaunca dad Ilanz/Glion sesafla ella zona da prighel da plirs implonts da fermada, perquei las sequentas informaziuns davart entginas novaziuns.


Ils plans da fuigia actuals cumpeglian las suandontas informaziuns:

  1. La definiziun digl alarm d'aua.
  2. Il territori communal che savess eventualmein vegnir inundaus en cass ch'in mir da fermada rumpess (sin la carta coluraus cun "blau" sco territori periclitaus).
  3. L'altezia d'aua maximala che vegn mo contonschida, sch'igl entir mir da fermada vegn destruius anetgamein. Quei san ins denton quasi excluder. En cass ch'il mir da fermada rumpa mo parzialmein, vegn l'inundaziun ad esser considerablamein pli pintga.
  4. Paliats cotschens che muossan en tgei direcziun ch'ils habitonts d'in territori periclitau ston fugir immediatamein, sche las sirenas d'alarm d'aua resunan.
  5. Locals da spetga segirs (rectangul verd).


Quels plans da fuigia surveschan sco agid d'evacuaziun en cass d'in alarm d'aua.

Plan da fuigia cun locals da spetga segirs

Territori periclitau, plan da fuigia en cass d'in alarm d'aua:
- Breil/Brigels (Vuorz), Ilanz/Glion (Castrisch, Glion, Rueun), Schluein, Sagogn, Stussavgia (Valendau)
- Breil/Brigels (Andiast), Ilanz/Glion (Pigniu e sid), Lumnezia (nord)

 

Partiziun segirtad dalla vischnaunca dad Ilanz/Glion