Novitads

Caras habitontas e cars habitonts dalla vischnaunca Ilanz/Glion

Ilanz/Glion, ils 13 da mars 2020

La Confederaziun e la Regenza han oz priu mesiras radicalas per frenar la derasaziun dil coronavirus. La pli aulta finamira ei da schurmegiar las persunas fetg periclitadas e da procurar, che provediments da sanadad e spitals san vinavon porscher lur prestaziuns. Per che quei gartegi a nus, essan nus tuts dumandai. Ei sa vegnir tier retardaments tier ils survetschs, enstagl da sesidas han sulettamein discuors al telefon liug ni che Vossa collega da lavur lavura naven da casa. Era en nies temps liber stuein nus morder e desister dil trenament da sport, digl exercezi da cant, dil concert, ni perfin dalla viseta ad in confamigliar el spital. L'administraziun communala vegn zuar a serrar las portas a moda fisica, resta denton vinavon a disposiziun cun tut ses survetschs per telefon ed e-mail (infoilanz-glionch ni 081 920 15 15).

Jeu sperel, ch'ils organisaturs hagien suenter la crisa supportada puspei avund'energia per prender suenter las occurrenzas ch'enriheschan la veta dil vitg e la cumpignia. E che nus consumentas e consuments semussein solidarics cun las fatschentas che piteschan gronds deficits.

La situaziun ei seriusa, nus vein denton ils mieds e las resursas da dumignar ella. Ina dallas pli impurtontas ei la solidaritad ella societad. Gidei Vus cun, che nus damognien quella sfida. E setegni vid las reglas da secuntener ed avis dallas autoritads.

En num dalla suprastonza communala e dil stab directiv communal giavischel jeu a Vus la perseveronza da tener la dira, confidonza e che Vus resties sauns.

Vossa presidenta communala Carmelia Maissen


Pachet da mesiras dalla Regenza grischuna dils 13 da mars 2020 (www.gr.ch) / (Rumantsch Grischun)
Pachet da mesiras dalla Regenza grischuna dils 15 da mars 2020 (
www.gr.ch) / (Rumantsch Grischun)