Novitads

Revisiun dalla planisaziun locala Ilanz/Glion - informaziuns

Tras la fusiun dallas 13 vischnauncas tier la vischnaunca Ilanz/Glion ston las planisaziuns localas existentas vegnir reunidas tier ina ordinaziun communabla da basa. Questa revisiun cumpleina dalla planisaziun locala, cumpigliau las leschas da baghegiar, ils plans da zonas, ils plans generals d'avertura sco era ils plans generals da formaziun, ei in project fetg pretensius, il qual vegn a cuzzar dus entochen treis onns.

La revisiun consista ord tschun fasas (lavur da fundament, conferenza dil pievel, plan da master, elavuraziun tecnica, planisaziun consecutiva). Las fasas 1-3 ein gia exequidas ed absolvidas. Il mument vegn luvrau vid la fasa 4.

Per informar extendidamein la populaziun, haveis Vus la pusseivladad da prender investa dil rapport fundamental sco era dil rapport dalla conferenza dil pievel. Aschi prest che ulteriurs pass ein fatgs, vegnin nus ad informar Vus.  

Suprastonza communala Ilanz/Glion