Elecziun substitutiva presidi communal

La presidenta communala resp. il president communal vegn eligida/eligius dil pievel per in temps d'uffeci da quater onns. La durada d'uffeci ei limi­tada a treis periodas d'uffeci en successiun. Per la presidenta communala resp. il president communal vegnan periodas d'uffeci precedentas ella suprastonza communala quintadas vitier a mesas, rundadas si sin la proxi­ma cefra entira.

La presidenta communala resp. il president communal meina las activitads dalla suprastonza communala e tgamunescha la direcziun e l'ad­mi­nistra­ziun. En cass urgents sa ella resp. el prender preventivamein las decisiuns provisorias necessarias. Ella resp. el vegn sustenida/sustenius en sia lavur dall'administraziun, sur­tut dalla canzlia.
 

Incumbensas en general

  • convocar e menar la direcziun
  • planisar e preparar las fatschentas dalla suprastonza communala
  • convocar e menar la suprastonza communala
  • representar las fatschentas dalla suprastonza communala el par­la­ment communal ed ellas cumissiuns parlamentaras
  • ordinar l'execuziun dallas decisiuns dalla direcziun, dalla suprastonza communala, dil parlament communal e dalla cuminonza dils votants all'urna e controllar che quellas vegnien realisadas
  • survigilar che las determinaziuns dalla constituziun communala e dallas ulteriuras leschas ed ordinaziuns communalas vegnien appli­cadas
  • representar la vischnaunca (incumbensas da representaziun) visavi il Cantun ed autras vischnauncas, visavi habitontas e habitonts, a ca­schun d'occurrenzas, en organisaziuns
  • tgirar ils contacts cun l'economia, il commerci, il turissem, la cultura e l'agricultura
  • prender encunter reclamaziuns e giavischs dalla populaziun (ura d'audienza)
  • menar e coordinar la lavur publica e la lavur da medias
  • haver la controlla generala sur da tut las partiziuns administrativas ed il persunal da vischnaunca, menar directamein ils commembers da direcziun
  • mantener il secret d'uffeci, observar las reglas da prender stgisa e ris­guardar il schurmetg da datas
     

Incumbensas tematicas

  • s'occupar dil svilup e dalla strategia da vischnaunca
  • program da legislatura
  • planisaziun dallas finanzas
  • preventiv
  • rapport annual e quen annual
     

Responsabladad e cumpetenzas

  • liquidar sin termin, a moda professiunala e confuorm agl uorden fa­tschentas communalas
  • menar la direcziun e la suprastonza communala a moda efficienta e tenor il reglament
  • garantir che las decisiuns vegnien pridas confuorm alla lescha
  • observar las directivas dil preventiv e da credit
  • mantener ils interess dalla vischnaunca viers anen e viers anora
  • exercitar il dretg da dar camonds sco responsabla ni responsabel per la direcziun
  • concluder expensas definiblas ch'ein buca previdas el preventiv to­chen ina summa da 1'000 francs per fatschenta individuala, en total 10'000 francs ad onn
     

Gremis colligiai ex officio cun il presidi communal

  • il biro dil parlament e las cumissiuns parlamentaras
  • la conferenza dils presidents dalla Regiun Surselva
  • la conferenza dils presidents dil Circuit dil register funsil Glion – Lum­nezia
  • la presidenza dil stab directiv communal
  • la conferenza dils presidents dil stan da tir Pardiala
     

Rapport e circulaziun d'informaziuns

  • a caschun da mintga sesida dalla direcziun, dalla suprastonza com­mu­nala e dil parlament communal
  • enteifer l'administraziun el rom dallas occurrenzas per il persunal
  • alla vicepresidenta communala ni al vicepresident communal tenor basegns
  • el rom d'ina discussiun per quartal cun la direcziun davart ils projects e las cefras trimestrialas
  • ina ga ad onn a caschun dil discuors davart il quen annual cun la cumissiun da quen e gestiun ed il post da revisiun
  • alla cumissiun da quen e gestiun tenor basegns
     

Pensum ed indemnisaziun

Il presidi communal ei in uffeci cumplein dad 80 pertschien. L'indemni­sa­ziun corrispunda alla classa da paga 24 dalla tabella da paga cantunala mintgamai actuala, ell'emprema perioda d'uffeci a 120 pertschien, ella secunda perioda d'uffeci a 124 pertschien ed ella tiarza perioda d'uffeci a 128 pertschien.