Entschatta da scola

Margis, ils 16 d’uost 2022 entschevin nus igl onn da scola 2022/23. Il team da scola selegra da puspei astgar beneventar ils affons.

En ils differents loghens da scola entschevin nus igl onn da scola suandontamein:

Glion – scoletta e scalem primar
Allas 09.00 serimnan tut ils affons da scola en lur stanza da scola. Ils scolarets serimnan allas 09.15 ella scoletta correspundenta. L’avertura ufficiala digl onn da scola per tut ils scolarets ed ils affons dil scalem primar ei allas 11.00 sin il plaz da pausa. Ils geniturs ein cordialmein envidai da prender part a quella. L’instrucziun tenor urari succeda naven dil suentermiezdi.

Glion – scalem superiur
Las scolaras ed ils scolars sentaupan allas 08.00 en l’aula dalla casa da scola (tract B). Suenter in cuort beinvegni ha l’instrucziun liug tier il scolast/la scolasta da classa igl avonmiezdi. Suentermiezdi vegn instruiu tenor urari.

Castrisch e Sevgein – scoletta e scalem primar
Igl onn da scola niev entscheiva allas 08.00 a Castrisch (rimnada avon casa da scola). Las partenzas digl auto da posta ein sco suonda: Riein 07.30, Luven 07.35, Isla 07.45, Sevgein 07.39. Ils scolars dalla 1. e 2.cl. da Sevgein dueien sche pusseivel deponer il turnister avon casa da scola a Sevgein avon che prender la posta a Castrisch.
Il survetsch divin ecumen entscheiva allas 09.00 ella baselgia a Castrisch. Tuts geniturs, tats e tattas ein cordialmein envidai da separticipar.
Allas 10.00 tuornan ils scolars dalla 1./2. cl. ed ils scolarets a Sevgein. Nus fussen engrazieivels per sustegn da taxi entras entgins geniturs. Grazia fetg. Ils carschi astgan puspei accumpignar ils pigns en scola.

Duvin – scalem primar
Entschatta digl onn da scola allas 7.35 cun scolaras/scolars e lur geniturs. S’entupada en stanza da scola. Program communabel entochen circa las 10.00. Silsuenter scola tenor urari.

Rueun – scoletta e scalem primar
Igl onn da scola entschevin nus sco usitau cun in survetsch divin allas 08.00 (rimnada allas 07.55). Silsuenter serendin nus ensemen en scola. Leu zambergein nus enzatgei communablamein. Era ils geniturs ein cordialmein beinvegni al survetsch divin sco era da zambergiar cun nus. Silsuenter van las scolaras ed il scolars en stanza da scola cun lur scolastas.

Ruschein – scoletta e scalem primar
Nus entschevin il niev onn da scola allas 8.15 cun scolars e scolarets en casa da scola a Ruschein. Ils geniturs astgan uonn accumpignar lur affons en stanza da scola.
Allas 11.00 fagein nus ina cuorta messa da scola en baselgia a Ruschein. Ils geniturs ein cordialmein envidai da separticipar a quell’occurrenza. Suenter quella astgan ils scolars accumpignar ils geniturs per marenda a casa.


Plan da vacanzas 2022/23
entschatta digl onn da scola: margis, ils 16 d’uost 2022
vacanzas d‘atun: 8-10-2022 – 23-10-2022
vacanzas da Nadal: 24-12-2022 – 8-1-2023
vacanzas da sport: 25-2-2023 – 5-3-2023
vacanzas da primavera: 22-4-2023 – 7-5-2023
finiziun digl onn da scola: vendergis, ils 30 da zercladur 2023
Firaus e gis libers tenor il plan da vacanzas sin la pagina d’internet www.scola-glion.ch

Per damondas stat il secretariat (081 925 28 29 ni info@scola-ilanz.ch) bugen a disposiziun. Nus giavischein a tuts ina biala entschatta. 
 


Glion, 05-08-2022