Revisiun dalla planisaziun locala – Informaziun pertuccont ils proxims pass da planisaziun en caussa reducziun dallas zonas da baghegiar

Da cuort ha la Regenza approbau la revisiun dalla planiaziun locala dils 9 da fevrer 2020. Cun quella planisaziun parziala ein las planisaziuns localas dallas anteriuras 13 vischnauncas vegnidas menadas ensemen, harmonisadas ed adattadas alla lescha surordinada. La lescha federala pretenda ina reducziun dallas zonas da baghegiar (en cass dalla vischnaunca dad Ilanz/Glion extendidas exzonaziuns). Quella reducziun ei aunc buca vegnida fatga ella revisiun vargada e sto vegnir realisada ella proxima fasa. La vischnaunca ha el dentertemps era elavurau in maletg empalont dil spazi (MES) ed approbau quel ils 6 d'avrel 2021.

Ella proxima fasa dalla planisaziun locala ston il maletg empalont dil spazi ed oravontut la reducziun dallas zonas da baghegiar (art. 15 LPS) vegnir mess entuorn. Per segirar la reducziun dallas zonas da baghegiar ha la vischnaunca relaschau il 12 da fevrer 2018 ina zona da planisaziun sur in grond diember da parcellas da baghegiar. Ella zona da planisaziun astga vegnir fatg nuot che impedescha la nova planisaziun ni cunterfa a tala, p. ex. il baghegiar novs baghetgs. Damai ch'ei era egl onn 2018 aunc buca diltut clar con gronda che la reducziun dalla zonas da baghegiar stoppi la finfinala esser, ei quella zona da planisaziun- mirau anavos - curdada ora relativ moderata. La Regenza dil cantun Grischun ha dacuort el rom d'ina procedura d'approbaziun dad in'autra vischnaunca grischuna stipulau suandonta practica: Vischnauncas cun ina populaziun che stagnescha ni che pren giu astgan salvar ina «reserva commensurada» da parcellas ella zona da habitar, zona mischedada e zona da centrum (HMC) aschia ch'ei vegn buca impediu che interessai sappien secasar. En quella decisiun ha la Regenza precisau la «reserva commensurada» per vischncaunca (el cass dad Ilanz/Glion per fracziun) sco suandont: «Sco commensurau ... vala tier vischnauncas pli pintgas (cun pli pauc che 500 habitonts/as) ina reserva restonta che corrispunda al basegns local da surfatscha da per regla 4 plazs da baghegiar (basegn elementar). En cass da vischnauncas cun dapli che 500 habitonts/as sa per regla vegnir concediu 1 plaz da baghegiar dapli per 100 habitonts/as. ...Excepziunalmein sa vegnir concediu alla vischnaunca ina pli gronda reserva restonta, quei el cass che las reservas dalla zona HMC el territori pli u meins surbaghegiau survargan il diember minimal da plazs da baghegiar concediu, ni sch'ei dat auters motivs stringents» (Conclus dalla Regenza dils 2 da fevrer 2021; Protocol nr. 109/2021). Con strict che la Regenza applichescha quella regla resp. tgei excepziuns ch'ella conceda ei pil mument aunc buca clar. Tenor quella nova practica dalla Regenza sto ei denton vegnir iu da quei anora, che las zonas da baghegiar en biaras fracziuns, las qualas han tenor las prognosas actualas mo ina pintga carschen, ina stagnaziun ni schizun ina digren dalla populaziun, stoppien vegnir reducidas bia pli massiv che quei era stau previu oriundamein, resp. che bia dapli parcellas che talas ch'ein tschaffadas actualmein ella zona da planisaziun seigien alla fin pertuccadas.

Ella fasa da planisaziun che vegn ussa eis ei da quintar cun ils suandonts pass:
(1) La suprastonza communala elaborescha el mument in sboz dil plan per redimensiunar las zonas da baghegiar tenor las premissas ord il dretg surordinau e la sura meziunada practica dalla Regenza. Aschigleiti ch'il sboz dil plan ei avon maun – probablamein igl atun 2022 - vegn la zona da planisaziun vertenta adattada corrispundentamein. Naven da quei termin astgan damondas da baghegiar sin ulteriuras parcellas, ch'ein oz aunc surbaghegiablas tenor stan legal, probablamein buca pli vegnir lubidas.
(2) Il sboz dil plan menziunau sco era ils acts dalla revisiun dil plan zonal vegnan tarmess al cantun per preexaminaziun.
(3) Sebasond sil rapport da preexaminaziun dil cantun vegn il project da revisiun surluvraus entras la suprastonza communala e silsuenter exponius duront 30 gis en ina procedura da participaziun. El rom da quella participaziun publica sa mintgin prender posiziun ed inoltrar propostas ni giavischs tier la suprastonza communala.
(4) Suenter quella procedura da participaziun vegn il project surluvraus entras la suprastonza communala e silsuenter presentaus al parlament communal respectiv suttamess alla votaziun all'urna per approbaziun.
 


Glion, 07-01-2022