Rueun

Rueun ha igl uestg Tello gia menziunau – da lezzas uras «Ruane» – igl onn 765 en siu testament. Il num «Rueun» deriva dil plaid latin «rova» che munta bova. Igl ei buc in num da fantasia. Ins ha baghegiau Rueun sin il cugn da bova dil dutg dil vitg. La fracziun cumpeglia territoris da vart seniastra e da vart dretga dil Rein anteriur, surfatscha alpina, uaul e caglias. Ultra da quei fan numerusas bialas aclas part da Rueun. Il vitg sez sesanfla sin ina terrassa sur il funs dalla val. La baselgia catolica da S. Andriu ei gia vegnida menziunada igl onn 840 ed ei in bein cultural prezius. Plinavon dat ei a Rueun quater capluttas pittorescas: S. Clau, S. Francestg, S. Antoni da Padua e S. Maria Madleina. La Via da Polacs cudezza da far in'excursiun ella natira. Naven da Glion meina ella per liung dil Rein tochen a Tavanasa. Ella ei vegnida construida ils onns 1940 tochen 1945 da schuldai polacs internai. Tablas commemorativas ed in sontget el vest, alla fin dil Plaun Grond regordan alla historia.

Uoppen Rueun tochen 31-12-2013