Populaziun

Cun 4'800 habitontas ed habitonts ei Ilanz/Glion la pli gronda vischnaunca ella Surselva ed ina dallas grondas el Grischun. La pli pintga fracziun ei Pigniu cun rodund 20 habitontas ed habitonts, la pli gronda ei Glion, nua che rodund la mesadad dalla populaziun habitescha. Il lungatg principal els vitgs ei il romontsch, el marcau da Glion era il tudestg. Plinavon san ins udir bia ulteriurs lungatgs sin las vias: portughes, serb, talian, spagnol, slovac, rumen ed arab. Igl in sper l'auter dil different sco segn caracteristic da nossa vischnaunca semuossa era el teppi da scrottas confessiunal, ina consequenza dall'aulta autonomia da pli baul els cumins dalla Rezia veglia.

Sco en biars loghens en regiuns muntagnardas ei la populaziun els habitadis decentrals plitost regressiva, ferton ch'ils vitgs ed il center da Glion ch'ein bein accessibels al funs dalla val creschan tendenzialmein. Tier las persunas che sesentan dacasa tier nus, s'audan era numerusas possessuras e possessurs da secundas habitaziuns. Seigi ch'els ein carschi si cheu e pli tard i per il mund, han denton aunc adina cheu lur ragischs, ni seigi ch'els ein s'inamurai en nossa regiun e passentan bugen cheu ina part da lur veta.