Novitads

Resgia Riein

Iniziants e historia dalla resgia veglia a Riein

La sanaziun cumpletta e reutilisaziun dalla resgia veglia a Riein ei vegnida iniziada sco project da cuminonza tras representants dall'anteriura vischnaunca Riein, Ralph e Doris Thut sco era dil biro d'architectura Curschellas + Gasser. La lavur ei per gronda part vegnida fatga da scolas e d'emprendists e quei sco lavur cumina. Las paucas finanzas han stimulau ils iniziants d'encurir sponsurs per las furniziuns da material e per las prestaziuns da lavur.


Ina veglia resgia dils onns 1940 ei vegnida renovada ed endrizzada aschia ch'ins sa duvrar ella per differents intents individuals. Cun la midada d'utilisaziun ei stau l'idea da porscher als pli differents interessents ed era alla populaziun dalla vischnaunca Ilanz/Glion in center per sentupadas, radunonzas, seminars, luvratoris e diversas occurrenzas culturalas. La casa da cultura Resgia Riein, la quala ei vegnida renovada tras lavur cumina da scolars ed emprendists, sustegn in patertgar concentrau e lavur en gruppas sco era seminars e luvratoris.