Bien otg onns suenter la fusiun ha la vischnaunca dad Ilanz/Glion in'administraziun che funcziuna pruamein ed ina paletta da projects el carcassa. Il sistem da miliz ch'ei aschia discargaus vegn denton buc automaticamein remplazzaus cun novas iniziativas dalla societad civila. Sco en biars loghens svanescha l'identitad dil vitg da tochen dacheu, en quei cass denton senza ch'ina nova identitad ed in'appartegnientscha evidenta alla nova vischnaunca fuss gia avon maun. Cun quei project vul la vischnaunca rinforzar ils potenzials dalla vischinonza communala ed identitad locala per il svilup regiunal. Pertgei il viver da cuminonza vischinonta, l'integraziun sociala ed engaschi dalla societad civila fuorman facturs impurtonts dall'attractivitad da habitar e la qualitad da viver. Gest la crisa da corona ha mussau a nus quei claramein.
Cunquei che quei project tucca in tema che pertucca biaras vischnauncas, cunzun vischnauncas fusiunadas, e persequitescha ina nova metoda, ein era il cantun e la confederaziun interessai. La confederaziun sustegn il project el rom dil program «projects da model per il svilup persistent dil territori 2020–2024».
Projects da model per il svilup persistent dil territori 2020–2024 (admin.ch)
La scol'aulta per scienzias applicadas da Turitg sustegn la vischnaunca tier la realisaziun dil project. Il project ha entschiet il zercladur 2020 cun intervestas en tut las fracziuns e cun bia damondas impurtontas:
