Sentupada «Reuniun en acziun»

Il project da model Reuniun sustegn il svilup dalla vischnaunca dad Ilanz/Glion suenter la fusiun igl onn 2014. En dus luvratoris aviarts cun la populaziun interessada han ins sviluppau ideas per projects da pilot per la societad civila che duein vegnir realisai ni instradai l'emprema ga el decuors digl onn 2021. Ils suandonts projects da pilot ein planisai:

  • Ciclus d'occurrenzas davart differents temas tenor il model «da cuminonza» a Ruschein.
  • Cant aviert: cant communabel regular per tuts.
  • Plattafuorma da brat online: ina plattafuorma digitala resp. ina plazza dil vitg digitala per sebrattar, crear reits e planisar communablamein projects ed occurrenzas.
  • Via Glion: ina via aulta turistica tras tut las fracziuns dalla vischnaunca vegn lantschada cun ina staffetta.
  • Coworking space: localitads a Glion che vegnan tratgas a nez communablamein per luvrar ordeifer il biro/il menaschi ed il homeoffice individual.
  • Tgira d'affons/project d'affons a Glion.
  • Turnier da ballapei per tut las fracziuns.

Per avanzar cun ils projects da pilot planisai e saver discutar strategias dil svilup communal ha liug tochen la fin 2023 circa quater ga ad onn ina sentupada aviarta da Reuniun.

L'emprema sentupada ha giu liug ils 21 da zercladur 2021. La secunda sentupada «Reuniun en acziun» ha liug mardis, ils 30 da november 2021. La sentupada ei aviarta per tut las persunas interessadas ed ei basegna negina annunzia. 


Adressa da contact per ulteriuras informaziuns e damondas: brdn@zhaw.ch