Ils 25 da mars 2021 ed ils 7 d'avrel 2021 han dus luvratoris aviarts cun persunas interessadas dalla populaziun giu liug el rom dil «project da model Reuniun». Envidau a tals havevan la vischnaunca sco era la scol'aulta per scienzias applicadas da Turitg (ZHAW) che meinan atras communablamein il project. La finamira dils luvratoris era d'encurir e sviluppar ideas per projects da pilot pusseivels per la societad civila ella vischnaunca fusiunada che duein vegnir realisai el decuors digl onn 2021. Quels projects da pilot duein promover la colligiaziun dallas differentas fracziuns, demussar in caracter che promova l'identitad, possibilitar l'integraziun da persunas ch'ein tochen dacheu aunc buca s'engaschadas sco era esser sempels, nunbirocratics e realisabels. Agl emprem luvratori ein 24 ed al secund 23 persunas da differentas gruppas da vegliadetgna, premissas e fracziuns separticipadas. Suenter discussiuns interessantas ed in brainstorming communabel ein las suandontas sis ideas per projects da pilot vegnidas scaffidas:
- Ciclus d'occurrenzas davart differents temas tenor il model «da cuminonza» a Ruschein.
- Cant aviert: cant communabel regular per tuts.
- Plattafuorma da brat online: ina plattafuorma digitala resp. ina plazza dil vitg digitala per sebrattar, crear reits e planisar communablamein projects ed occurrenzas.
- Via Glion: ina via aulta turistica tras tut las fracziuns dalla vischnaunca vegn lantschada cun ina staffetta.
- Coworking space: localitads a Glion che vegnan tratgas a nez communablamein per luvrar ordeifer il biro/il menaschi ed il homeoffice individual.
- Tgira d'affons/project d'affons a Glion.
Essas Vus interessai da separticipar ad in da quels projects da pilot?
Lu s'annunziei cheu: brdn@zhaw.ch
