L'ordinaziun d'immobilias dalla vischnaunca Ilanz/Glion ei entrada en vigur per igl 1. da schaner 2022. Tenor art. 8 al. 4 dalla lescha d'immobilias ein utilisaders che giavischan ina midada dall'occupaziun annuala existenta obligai da s'annunziar tier la vischnaunca. Ultra da quei duei ina renunzia dil diever duront certs meins resp. midadas dil diever era vegnir annunziadas (art. 8 al. 5).
Indicaziuns obligatorias per annunziar in'occupaziun annuala:
- adressa cumpleta dall'uniun ni dalla persuna privata
- persuna da contact responsabla
- numera da telefon ed adressa dad e-mail
- localitad giavischada
- gi dall'jamna e temps giavischau (indicar il cuoz)
- spazi da temps giavischau (datum dall'entschatta e dalla fin, renunzia temporara)
- intent/motiv dalla reservaziun
- diember da participonts
Tarmetter l'annunzia a: reservationen@ilanz-glion.ch
Davos termin d'annunzia: mesjamna, ils 22 da matg 2024
Nus supplichein per in'annunzia da tut ils utilisaders che fan diever sur onn dallas localitads ed indrezs (divergent digl art. 8 al. 4 dalla lescha d'immobilias). Quei vala per tuttas localitads ed indrezs dalla vischnaunca dad Ilanz/Glion, q.v.g. era per stanzas da sesidas. Bien engraziament per la capientscha e Vossa preziada collaboraziun.
L'occupaziun annuala per ils utilisaders permanents planisescha il secretariat canzlia ed il secretariat scola entochen sil pli tard miez fenadur 2024. La repartiziun dallas localitads e la confirmaziun retscheivan ils utilisaders medemamein entochen quei termin.
La lescha e l'ordinaziun davart l'utilisaziun dad immobilias dalla vischnaunca Ilanz/Glion anfleis Vus cheu ed il sistem da reservaziun ei d'anflar cheu.
Informaziuns davart il diever dallas hallas da gimnastica:
La basa legala prevesa da reducir la tariffa per l'occupaziun annuala per 5 pertschien per mintga meins che la halla da gimnastica vegn buca duvrada, cun excepziun dil meins fenadur. Quella mesira duei promover in'utilisaziun optimada dallas localitads e dils indrezs e permetter a dapli persunas da far diever dallas immobilias disponiblas. En cass da damondas supplichein da prender si contact (reservationen@ilanz-glion.ch).
Las hallas da gimnastica ein serradas ils suandonts gis:
- a caschun da firaus cumandai;
- denter Nadal e Daniev;
- mintgamai quater jamnas naven dalla finiziun digl onn da scola.
Glion, 26-04-2024
