Ilanz/Glion porscha numerusas pusseivladads per ina recreaziun activa ed aventuras – ideal per amaturas ed amaturs dil sport, per famiglias e per ils amaturs dalla natira. La stad ni igl unviern, cheu vegnan tuts sin lur cuosts.
Activitads da stad
Gudi duront la stad las pusseivladads da viandar e dad ir cun velo da muntogna senza fin ella Surselva. El Paradiswäldli a Glion sesanfla ina senda tematica d'uaul per l'entira famiglia ed in Vita Parcours. Tgi che vul viagiar gest plirs gis sil territori communal sa absolver la spassegiada d'etappas «Via Glion». Quella senda meina sin vias natiralas tras tut las fracziuns dalla vischnaunca Ilanz/Glion.
Per las amaturas ed ils amaturs da picnic datti numerusas fueinas per liung dallas sendas pittorescas.
Aventuras ell'aua
Era ils ratuns d'aua vegnan buc alla cuorta. La Ruinaulta enconuschenta porscha in'aventura ella natira spectaculara. Ella s'extenda sin varga 13 kilometers denter Glion e Rehanau. En certs loghens ei la Ruinaulta entochen 400 meters profunda e dat suttetg a specias d'utschals fetg periclitadas sco il rieven da flum ed il gravarel. Sil Rein datti differentas activitads sco river rafting, viadis da cajac ni canu. La cavorgia dil Rein sa era vegnir perscrutada a pei, cun velo ni cul tren. Tgi ch'ei alla tscherca da muments pli ruasseivels sa senudar ni sluccar las combas el bogn aviert a Glion. Per affons datti ina ruschnera ed in bogn d'affons.
Infrastructura da sport
Sil territori dalla vischnaunca Ilanz/Glion sesanflan biars stabiliments da sport per mintga interess. Seigi quei plazzas da ballapei, plazzas da tennis, plazzas da beachvolley, Vita Parcours, pusseivladads da reiver ni in pumptrack ed in implont da skate – cheu vegn purschiu tut per ils entusiasts da sport. Era plazzas da golf datti el contuorn. Ina survesta dils implonts da sport e temps liber anfleis Vus cheu.
Aventuras d'unviern
Era duront igl unviern ha Ilanz/Glion da porscher enqual caussa. Ils treis territoris da skis gronds da Flem Laax, Breil Vuorz Andiast e Sursaissa Mundaun ein contonschibels enteifer cuort temps. En cass ch'ei ha avunda neiv cussegliein da visitar ils ulteriurs runals pli pigns el contuorn. Ultra da quei datti el conturn differentas loipas, sendas da viandar d'unviern, vias da scursalar e plazzas da glatsch. Ulteriuras informaziuns davart pusseivladads da far sport d'unviern anfleis Vus tier Surselva Turissem.