Luven

Il bi vitg muntagnard da Luven sesanfla sin 768 m. s. m. tochen 1'604 m. s. m. alla spunda el sidost dil Péz Mundaun che vegn era numnaus il Rigi dil Grischun. Igl unviern envidan differentas turas da gianellas da passentar temps ella natira intacta. Luven ha ina liunga historia. Las empremas perdetgas historicas per la colonisaziun da quella regiun derivan dil temps da bronz (ca. 1800 – 800 a. C.). Il cat d'ina fibla da bronz, ch'ei oz exponida el Museum retic a Cuera, e da rests d'in skelet en ina fossa stabila da plattas en ina cava da glera sper la Val Pilac (Quadras) igl onn 1887 muossa ch'era Luven savess esser staus colonisaus dil temps da bronz. Cats da muneidas, cheramica ed utensils muossan era la preschientscha dils Romans che han occupau il Grischun igl onn 15 a. C. El testament da Tello, in uestg da Cuera, digl onn 765 vegn Luven numnaus l'emprema gada en in document.

Uoppen Luven tochen 31-12-2013

La Panera da Luven ei curdada

La «Panera» veva ca. 200 onns ed era la numera dus dils pégns aults en Svizra: 47.63 meters. Ella ei vegnida pinada ils 12 da december 2018 cun gronda participaziun dalla populaziun dalla regiun. Il num «panera» ha da far cun la fuorma dalla roma dalla plonta pompusa: La roma fageva endamen las paneras da pli baul, in indrez per conservar il paun e per proteger el dallas miurs.