Uoppen

Il fatg d'uoppens deriva dil temps medieval. Uoppens survevan alla differenziaziun da cavaliers ed armadas el cumbat. Cul temps han ils uoppens piars lur muntada militarica; aschia ein els vegni tier simbols da maletg per famiglias impurtontas ed adina dapli era da corporaziuns sco marcaus, dertgiras ni mistronzas.

Oz meinan il cantun Grischun e sias vischnauncas politicas in uoppen sco segn da lur identitad e muntada. Lur uoppens ein l'emprema gada vegni defini a moda ligionta igl onn 1953; il stan actual ei d'anflar el register digital d'uoppens dil cantun.

Il blasonament digl uoppen da Glion ei: En tgietschen cuora il flum blau cun ur d'argien (Rein) diagonal atras la cruna d'aur. Il motiv dil Rein che flessegia atras la cruna va anavos sin maletgs da sigil pli vegls dil marcau da Glion sco era dalla vischnaunca ella Foppa.

La cruna egl uoppen da Glion ei probablamein d'interpretar sco cruna da mir (el senn dil mir dil marcau) ed accentuescha il status da Glion sco marcau losch al Rein. Glion possedeva gia avon varga 700 onns il dretg da marcau ed era circumdaus d'in mir. Igl uoppen dil marcau cul scut tgietschen, la cruna d'aur ed il Rein blau ei buca mo vegnius transmess en collecziuns pli veglias d'uoppens, mobein dat era perdetga silla Porta Sura (Obertor) dil marcau da Glion.

Dapi la fusiun da vischnauncas digl 1-1-2014 s'audan las anteriuras vischnauncas ella Foppa sco fracziun tier la vischnaunca hodierna. La nova vischnaunca ha surpriu igl uoppen dil marcau da Glion senza midadas. Ils uoppens dallas fracziuns astgan denton vegnir duvrai vinavon tier occurrenzas els vitgs. Els ein mintgamai da veser els purtrets dallas fracziuns sin questa pagina d'internet.