Svilup dil center Glion

Sco en biaras autras vischnauncas sedamondan ins era a Glion «nua meina ei il center?» e «co sa il center restar attractivs?». Strategias e mesiras cheutier ston denton vegnir adattadas individualmein per mintga liug. Il project «svilup dil center Glion» cun las purtadras Uniun da commerci e mistregn Glion e contuorn (HGVI), la vischnaunca dad Ilanz/Glion e la Surselva Turissem SA vulan perquei metter en fuorma il center regiunal per igl avegnir.

Sut la direcziun dall'Uniun da commerci e mistregn Glion e contuorn e cun grond sustegn dalla vischnaunca ei silsuenter la gruppa da manischar seformada, ella quala s'audan era representants dalla Surselva Turissem SA e dalla Regiun Surselva. Igl emprem han persunas dil fatg fatg in maletg dil caracter e dall'identitad da Glion ord vesta externa. Ins ha rimnau impressiuns e datas, menau discuors sco era eruiu fermezias e fleivlezias. Per la discussiun dalla vesta interna ein 30 acturs dil center elegi sentupai la fin mars 2019 ad in luvratori. El fratemps ei in muossavia d'acziuns cun propostas concretas avon maun. La realisaziun duei succeder da differents purtaders duront projects parzials pli gronds e pli pigns. La finamira dil svilup dil center ei, da far fit il marcau da Glion sco motor economic per igl avegnir.