Strategia d'immobilias

La vischnaunca giuvna dad Ilanz/Glion posseda ca. 300 baghetgs – ina brava cefra en cumparegliaziun cun autras vischnauncas. La valeta totala da quei portfolio munta a ca. CHF 146 milliuns (valeta nova). Ins sedamonda, co igl ei da tractar quels baghetgs il futur. Tgei baghetgs duein vegnir manteni per intents communals? Nua eis ei da patertgar vid l'affittaziun ni la vendita? Tgei baghetgs duein vegnir salvai per proximas generaziuns? Per sclarir quellas damondas cumplexas e sin incumbensa dil parlament communal ha la suprastonza communala entschiet igl onn 2020 cun l'elaboraziun d'ina strategia d'immobilias. La finamira da quella lavur ei da scaffir ina basa plausibla per il tractament futur cun quels edifecis, d'alzar la rentabilitad e d'elaborar propostas strategicas, co tgeininas immobilias san vegnir nezegiadas per il svilup positiv dalla vischnaunca. Las lavurs pretendan ina confruntaziun precauta. Ins ha engaschau ina gruppa da project cun sustegn extern che dat rapport alla suprastonza communala ed al parlament communal. Las lavurs duein vegnir terminadas igl atun 2021.

Revisiun totala dalla planisaziun locala

Maletg empalont dil territori communal (MTC)