Local da giuventetgna Glion

En collaboraziun e cun sustegn dils luvrers socials (persunal dil fatg), ha la giuventetgna saviu realisar ed endrizzar in agen local. Quei local sesanfla ell’anteriura fabrica d'oxigen alla Via Santeri 78. Igl ei vegniu planisau, luvrau, empruau, semiau e la finfinala realisau in flot local da giuventetgna. Medemamein han differents luvratoris «workshops» giu liug. Quels ein vegni accumpignai dil persunal dil fatg extern. 
Duront in luvratori han ei creau communablamein e cun sustegn d'in sprayer professiunal in aschinumnau «grafitti». Cheutras han ils participonts giu la caschun d’emprender d’enconuscher ils impurtonts Dos and Don’ts ch’ei basegna per luvrar cun in vapurisader. 
In ulteriur punct culminont ei la realisaziun dalla bar: La giuventetgna ha planisau e baghegiau quella bar. Per la bar han ei duvrau restonzas da lenna veglia. La bar ei endrizzada per saver porscher buns coctails senza alcohol. 
Visavi la bar sesanfla ina rampa per ir cun skateboard. Sin quella rampa han ins la pusseivladad da trenar ed empruar ora differents trics cul skateboard. Pia in liug plein moviment, divertiment e progress.
En la stanza dasperas sesanfla ina gronda cuschina, ch'envida da cuschinar e crear buns desserts. Alla meisa gronda s’entaupan ils giuvenils stediamein per dar giugs, dar ina paterlada ni per autras activitads creativas. 

Duront quei temps san ils giuvenils guder sortida a moda giuvenila. Ei vegn giugau bigliard, iu cun skateboard, dau ballapei da meisa, tedlau musica, cuschinau ensemen ed aunc bia auter.
Persunas dil fatg accumpognan ils giuvenils atras las seras. Els procuran buca mo per segirtad, mobein sustegnan era tier conflicts e malruaus. En quella rama han ils giuvenils la pusseivladad da decider libramein co crear e guder lur temps liber. In passatemps nua ch'ils giuvenils retscheivan sustegn da tut temps ed en mintga situaziun. Marianna Couto, menadra dalla lavur da giuventetgna ei contonschibla sut 079 840 37 39 ni per mail sut: marianna.gomescouto@lumnezia.ch.