Lavur da giuventetgna Ilanz/Glion
Preschientscha
Nus essan presents a moda fidada e rinforzein ils giuvenils da sviluppar l'atgna responsabladad e l'atgna efficacitad.
Cuminonza
Nus promovin la cuminonza cun crear pusseivladads per relaziuns ed interess differents.
Scuntrada
Nus tractein ils giuvenils cun stema, a moda aviarta e conscient da nossa responsabladad.
La lavur da giuventetgna Ilanz/Glion porscha als giuvenils in liug da sentupada aviert che possibilitescha scuntradas, brat ed experientschas communablas – libers da squetsch da prestaziun e consum. El center stat in spazi che vegn formaus activamein da giuvenils e che dat ad els la pusseivladad dad inoltrar e realisar lur ideas.
Ella Via Santeri 78 – ell'anteriura fabrica d'oxigen – ei naschiu en collaboraziun cun persunas dil fatg dalla sociocultura in spazi da giuventetgna multifar. Da cuminonza ei vegniu planisau, baghegiau e formau. Aschia s'audan oz denter auter ina bar construida sez, ina rampa da skating, loghens per seretrer creativs sco era ina cuschina bein equipada tier il liug da sentupada. Cuschinar communablamein, tedlar musica, giugar ni luvrar creativ – il spazi porscha pusseivladads multifaras da passentar il temps liber.
Mintga venderdis sera arva il «Jugi» sias portas per giuvenils dil scalem superiur naven dalla 7. classa. Accumpignada vegn la sera da persunas dil fatg che procuran per ina rama segira e sustegnan ils giuvenils en lur svilup persunal. Entras discuors motivonts e metodas participativas vegnan ils basegns dils giuvenils pri serius e lur independenza rinforzada intenziunadamein.
Igl access alla lavur da giuventetgna ei sempels e la cussegliaziun stat era a disposiziun a geniturs e persunas da referiment. Il secuntener che promova la sanadad vegn tematisaus activamein ed ils giuvenils vegnan susteni da sviluppar ina sauna stima da sesez e d'anflar lur atgna via ella veta da carschi.
Ina incumbensa impurtonta ei plinavon la colligiaziun enteifer la vischnaunca e la regiun. La lavur da giuventetgna collaborescha cun instituziuns ed autoritads e s'engascha per ils interess dils giuvenils. La finamira ei da promover ina cuminonza activa e viva, nua che persunas giuvnas san cooperar e surprender responsabladad.
La lavur da giuventetgna Ilanz/Glion creescha aschia in liug nua che giuvenils passentan buca mo lur temps liber, mobein creschan, emprovan ora e vegnan udi cun lur quitaus.
Lavur da giuventetgna – «s Jugi»
Mintga vendergis sera ei il local da giuventetgna «s Jugi» aviarts pils giuvenils naven dalla 1. superiura.
*unviern (october-mars): 18.00 - 22.00
*stad (avrel-settember): 19.00 - 22.00
Marianna Couto, menadra dalla lavur da giuventetgna ei contonschibla sut 079 840 37 39 ni per mail sut: marianna.gomescouto@lumnezia.ch.