Valurs
Las valurs fuorman il fundament da nies agir e da nossa convivenza. Ellas defineschan ils principis tenor ils quals las autoritads, l'administraziun e la populaziun prendan decisiuns ed interageschan in cun l'auter. Sco directivas ligiontas caracteriseschan ellas nossa cultura communala e demuossan las valurs da nossa cuminonza e co nus lein ademplir nossas incumbensas.
Colligiont
Nus promovin la coesiun e la convivenza en nossa vischnaunca. Entras nies agir creein nus inscunters prezius e muments communabels che colligian ils carstgauns independentamein da lur domicil, derivonza ni situaziun da viver. Nus essan ina cuminonza che sebasa sin la fidonza, l'aviartadad ed il sustegn vicendeivel. Ensemen concepin nus il futur dad Ilanz/Glion e contribuin che tuttas e tuts sesentan beinvegni e da casa en nossa vischnaunca.
Appreziont
Nus sescuntrein cun respect e renconuschientscha. La rihezia culturala e linguistica da nossa vischnaunca sco era la diversitad d'opiniuns, ideas ed experientschas enriheschan nies mintgagi. Nus promovin in brat aviert e cun respect en tut ils secturs ed appreziein la contribuziun da mintga singul. Quella stema vicendeivla rinforza la convivenza e creescha in'atmosfera ella quala tuttas e tuts vegnan udi e respectai.
Persistent
La persistenza ei il punct central da nies agir. En quei connex mettin nus claras prioritads e concepin noss'utilisaziun dallas resursas a moda cunscienta ed orientada enviers il futur. Nus promovin in'economia che creescha stabilitad a liunga vesta e che metta el center il beinstar dils carstgauns. Nossas decisiuns segireschan il beinstar dallas generaziuns dad oz e damaun.
Prospectiv
Nossas decisiuns sebasan sin in sguard clar el futur. Nus considerein las consequenzas da nies agir a liunga vesta e s'orientein allas sfidas da damaun. Cun in patertgar strategic, ina planisaziun vasta ed in agir a liunga vesta scaffin nus ina vischnaunca che resta era vitala ils proxims decennis.
Curaschus
Nus havein la curascha dad ir novas vias, d'acceptar midadas e da sviluppar sligiaziuns innovativas. Esser curaschus munta per nus era da surprender responsabladad, da prender decisiuns e da realisar talas consequentamein. Era en temps pretensius agin nus a moda activa e decidida per promover nossa visiun dad esser ina vischnaunca persistenta e pulsonta.