Egl areal da sport e temps liber Fontanivas a Glion vegn in liug d'inscunter per entusiasts da sport da tut las vegliadetgnas creaus: in pumptrack ed implont da skate modern, in spazi per moviment, inscunters ed entusiassem. Igl implont sin rodund 1'500 m² sesanfla gest sper il bogn aviert ed envida dad esser activs. Novs trics san ins emprender ni semplamein guder la natira en cumpignia dad amitgas ed amitgs.

L'idea per in pumptrack ei naschida ell'uniun «a Glion» ch'ei vegnida fundada igl atun 2021 per realisar projects innovativs els secturs sport, cultura e temps liber sin intschess dad Ilanz/Glion. Cun grond engaschament ha l'uniun promoviu e realisau il project – aschia ch'il siemi daventa ussa realitad.

L'idea per in implont da skate ei vegnida directamein dalla giuventetgna. A caschun dall'emprema sessiun da giuventetgna dils 22 d'avrel 2023 han giuvenils dad Ilanz/Glion exprimiu lur giavischs ellas tematicas mobilitad, sortida e temps liber. En in'incumbensa alla suprastonza communala eis ei vegniu declarau il basegn per in implont da skate. La suprastonza communala ha priu serius quei impuls ed ha examinau nua ch'igl implont da skate savess vegnir realisaus. Aschia ein treis projects gronds sesviluppai el territori Fontanivas a Glion: La construcziun d'ina plazza da ballapei artificiala scaffescha plaz per il pumptrack ed igl implont da skate – in ferm signal per cooperaziun, innovaziun e per in svilup communal en favur dalla giuventetgna.

In pumptrack ei cheu per tuts: affons pigns cun velo, giuvenils cun scooter ni skateboard, carschi cun velo ni era l'entira famiglia. Il diever dil pumptrack ei sempels, fa spert plascher e resta interessants a liunga vesta– cun stortas, undas e segls che porschan adina novas sfidas. Per ils pigns ei vegniu planisau in kidstrack separau ch'ei adattaus specialmein a lur basegns.

Sco punct culminont tut special sesanfla denter il pumptrack ed igl implont da skate in vagun vegl dalla Viafier retica che survescha sco stanza d'inscunter cun indrezs sanitars – in liug da retratga original e practic per pausas, mirar tier ni semplamein per la recreaziun. Il diever precis vegn aunc elavuraus cun integrar partenaris impurtonts ellas discussiuns.

Cun siu layout bein ponderau e sia grondezia metta il pumptrack a Glion novas mesiras ella regiun Surselva. Igl implont corrispunda als standards dall'Union Cycliste Internationale (UCI) ed ei aschia era adattaus per occurrenzas da sport.

Giuven ni vegl, entschevider ni avandau – cheu nescha in liug nua che tuts ein beinvegni. Il pumptrack a Glion porta moviment – gleiti eis ei aschi lunsch!

Festivescha ils 21 da zercladur 2025 l'avertura cun nus!