Nova zona da sentupar e da moviment tier il Paradiswäldli a Glion
Igl areal nua ch'igl anteriur deposit dil Museum Regiunal Surselva sesanflava, gest sper la plazza da giugs populara Paradiswäldli a Glion, ei vegnius concepius da niev. La finamira da quella revaletaziun ei da motivar la populaziun da semover dapli e da promover il brat denter las generaziuns. Naschius ei in liug multifar che cumbinescha il giug, la sanadad ed igl inscunter.

Crusch da ballantschar – trenar igl equiliber a moda termaglionta
La crusch da ballantschar ei vegnida niev vitier. Quei indrez ha la vischnaunca Ilanz/Glion survegniu gratuitamein sin iniziativa dil post da survetsch coordinaziun da sport grazia ad ina publicaziun digl uffeci da sanadad dil cantun Grischun. La crusch da ballantschar porscha quater exercezis da ballantschar che secruschan enamiez. Per mintga exercezi datti differents grads da difficultad.

Daco ch'igl ei impurtont da haver in equiliber stabil:
In bien equiliber rinforza la musculatura profunda, migliurescha la percepziun dil tgierp e la coordinaziun e scolescha la capacitad da reagir. Gest per persunas pli veglias gida in trenament d'equiliber d'evitar cupitgadas e mantener la movibladad el mintgagi.

La crusch da ballantschar envida da testar e migliurar a moda termaglionta l'atgna ballontscha – ina contribuziun sempla, denton fetg effectiva, alla sanadad per giuven e vegl.

Senda dad ir a pei blut – sentir la natira sut ils peis
Sigl areal sesanfla era ina senda dad ir a pei blut cun differents materials natirals. Ir a pei blut animescha ils senns, promova la circulaziun dil saung, rinforza la musculatura dils peis e procura per in'experientscha dil tuttafatg nova – ideal per pign e grond.

Semplamein trer ora ils calzers, ir pass per pass tras ils differents quadrels, star cuort eri e percepir cunscientamein la natira. Senta las differentas materialias e gauda las impressiuns variontas.

In liug da sentupar e per il moviment
La nova zona per semover tier il Paradiswäldli a Glion colligia giug, divertiment e promoziun dalla sanadad en in liug. Seigi quei la plazza da giugs, igl implont da botscha, la senda dad ir a pei blut ni la crusch da ballantschar – cheu vegnan generaziuns ensemen per semover, sebrattar ni semplamein guder il temps ell'aria frestga.

Nova zona da sentupar e da moviment tier il Paradiswäldli a Glion
Igl areal nua ch'igl anteriur deposit dil Museum Regiunal Surselva sesanflava, gest sper la plazza da giugs populara Paradiswäldli a Glion, ei vegnius concepius da niev. La finamira da quella revaletaziun ei da motivar la populaziun da semover dapli e da promover il brat denter las generaziuns. Naschius ei in liug multifar che cumbinescha il giug, la sanadad ed igl inscunter.

Botscha – giug e divertiment per tuttas generaziuns
Sin giavisch dalla populaziun ha la suprastonza communala decidiu d'ereger in implont da botscha sigl areal. Botscha – era enconuschent sco petanque – ei in giug popular cun ragischs mediterranas. La finamira ei da plazzar las atgnas ballas aschi datier dad ina balla pintga sco pusseivel. Ei drova inschign, tactica ed in maun ruasseivel.

Il giug ei sempels d'emprender, fa plascher ed ei adattaus per tuttas gruppas da vegliadetgna – ideal per inscunters spontans e concurrenzas pacificas.

L'utilisaziun digl implont da botscha ei gratuits. La vischnaunca metta a disposiziun in set da ballas. Sche quel vegn allontanaus ni destruius ston las ballas il futur vegnir organisadas sezzas.