Igl Areal Maissen schai all'entrada orientala da Glion sper la via cantunala che meina a Castrisch, visavi digl anteriur baghetg dalla Migros Center Mundaun. El fa part dil plan da quartier Center Staziun (2020) ch'ei vegnius mess en vigur igl onn 2023.
Alla votaziun all'urna dils 9 da fevrer 2025 ha la populaziun dalla vischnaunca Ilanz/Glion decidiu – tenor la recumandaziun dil parlament communal – la cumpra digl Areal Maissen, parcella 485. Cun igl acquist survegn la vischnaunca la pusseivladad da formar activamein il svilup urbanistic dil marcau da Glion e da crear spazi da habitar e da commerci pagabel.
El senn d'ina politica attractiva da baghegiar habitaziuns ha la suprastonza communala decidiu, da garantir sigl Areal Maissen in diever mischedau. Ei duei vegnir creau spazi da habitar per famiglias, persunas giuvnas, senioras e seniors, persunas cun entradas grondas e persunas cun entradas pli bassas sco era per indigens e forzas da lavur ch'ein vegnidas neutier.
Per la realisaziun enquera la vischnaunca in investur directiv che sustegn il svilup digl Areal Maissen e che dispona da pusseivladads finanzialas da realisar silmeins dus tiarzs digl areal.
Ad investurs interessai stattan ulteriuras informaziuns a disposiziun:
1. Fegl da fatgs davart igl areal Maissen
2. Prescripziun dil plan da quartier Center Staziun
Rapport da planisaziun e cooperaziun
Plan d'avertura traffic 1:1'000
Plan da formaziun 1:1'000
Situaziun veglia 1:1'000
3. Lescha da baghegiar dalla vischnaunca Ilanz/Glion