Piunier solar LOUIS PALMER ed il SolarButterfly vegnan a Glion
Mesjamna, ils 20 da matg 2026, Aula dalla scola, Glion
Ils 20 da matg 2026 survegn la populaziun a Glion la caschun d'emprender d'enconuscher Louis Palmer cun siu SolarButterfly. Da niev dalla partida: il museum dil clima.
Il SolarButterfly ei vegnius sviluppaus da student:as dalla scol'aulta da Lucerna a Horw e construius en cooperaziun cun biaras firmas dalla Svizra Centrala. Ses varga 40 m2 panels solars faldabels produceschan l'electricitad pigl auto electric che trai el. La tschitta simbolisescha la midada – naven dallas energias fossilas viers in futur schuber, independent. Il vehichel ei plinavon sigl entir mund igl emprem da siu gener ch'ei vegnius producius per gronda part ord butteglias da PET recicladas ord igl ocean.
Dil 2022 entochen 2025 ha Louis Palmer fatg cul vehichel solar varga 100'000 kilometers cun energia solara – tras 48 tiaras sin tschun continents. El ha visitau scolas, interpresas da cleantech ed inventadras che presentan sligiaziuns encunter la midada dil clima. Suenter siu retuorn ei il SolarButterfly vegnius transformaus – dalla rulotta el museum. Pertgei ussa eis ei uras da mussar las sligiaziuns dil clima ch'il SolarButterfly ha anflau sin siu viadi entuorn il mund!
Emprender dil piunier solar
Sin invit dalla cumissiun d'energia Ilanz/Glion viseta il piunier solar Louis Palmer ils 20 da matg 2026 cul SolarButterfly e siu niev museum dil clima Glion. En in referat raquenta el da siu viadi che ha d.a. era menau el alla conferenza mundiala dil clima 2025 en Brasilia. Interessents san prender investa dil vehichel e seschar inspirar en in'exposiziun dallas pli innovativas, semplas e creativas sligiaziuns da clima ch'il team dil SolarButterfly ha scuvretg sin siu viadi.
Flyer
Datum: mesjamna, ils 20 da matg 2026
Liug: Aula dalla scola Glion (Paradisgärtli 9)
Program:
19.00 inspecziun dil vehichel (plaz da scola)
19.30 referat da Louis Palmer ell'aula
20.30 apero cun viseta dall'exposiziun davart sligiaziuns dil clima (museum dil clima)
L'entrada ei libra.
Nus selegrein da Vossa participaziun!
Cumissiun d'energia Ilanz/Glion
