Geografia

Cun ina surfatscha da 4,67 km2 era il marcauet da Glion, en cumparegliaziun cun autras vischnauncas ella Surselva, plitost pigns. Grazia alla fusiun cun las vischnauncas da Castrisch, Duvin, Ladir, Luven, Pigniu, Pitasch, Riein, Rueun, Ruschein, Schnaus, Sevgein e Siat ei la nova vischnaunca dad Ilanz/Glion naschida cun ina surfatscha remarcabla da 133,5 km2.

Quei territori s'extenda denter il Crap Masegn ell'Arena alva e las alps da Duvin e tonscha dalla Ruinaulta (670 m. s. m.) entochen si tier il Hausstock (3'158 m. s. m.) sil cunfin cun la Glaruna. Ils vitgs che circumdeschan Glion alla costa dils cuolms dil Péz Mundaun, dalla cadeina da Signina ed ella vart dil sid, sco in tschupi, tier la confluenza dil Rein anteriur e dil Glogn, fuorman in'ulteriura foppa all'entrada dalla Ruinaulta, ch'ei enconuschenta sigl entir mund.

Lein dar il plaid al viandont Samuel S. Kistler, il qual ha trapassau igl onn 1857, derivond naven da Trun, il territori che s'auda oz tier Ilanz/Glion e nudau sias impressiuns en in diari da viadi: «Ina vesta magnifica dalla spunda verda seniester si enviers il bi vitg da Rueun che schai sin in'aulta planira sulegliva, seniester da nus ina ruina da casti che mira dils aults surengiu. Nus eran arrivai a Schnaus, igl Interlaken natural ed amicabel, buca modernisau, cun ses nughers e pumers che fuorman dretg e seniester dalla via alternont cun las casettas carinas da lenn ina gassa stretga ed umbrivauna. Uss sesarva l'egliada sil veglianzer Glion e sil plaun dalla val.» E duront mirar anavos sin la punt dil Rein a Glion vegn Kistler puspei surprius da plein'aduraziun: «Atras las petgas uiarschas da domisduas varts dalla punt semuossava ina dallas pompusas cuntradas da cuolms mirond dil Rein si; sco sin terrassas mav'ei davos si; sur Schnaus mava l'egliada vinavon sin Rueun, che schai plein maiestusadad, sc'in marcauet dallas Appeninnas, sur Pigniu sper igl Hausstock ault si.»