Spért da piunier al Rein giuven

Avon varga 700 onns vegn Glion menziunaus l'emprema gada sco liug cun dretg da marcau. Sco emprem marcau al Rein e sco «in liug circumdaus da mirs, el qual biaras persunas vegnan ensemen per habitar». Oz havein nus aviert nos mirs ed essan, ensemen cun las fracziuns dil contuorn, la nova vischnaunca dad Ilanz/Glion. Perquei entupeis Vus tier nus dad ina vart il marcauet viv da Glion sco center d'ina regiun d'eveniments, da cultura e d'economia, da l'autra vart dudisch vitgs muntagnards ch'ein circumdai da natira magnifica ed intacta. Ils extrems s'attiran e portan vitalitad. Marcau e campagna, cuolm e val, romontsch e tudestg, cultura e sport, agricultura ed innovaziun, hosps ed indigens.

Il spért da piunier dil liug da commerci dil temps medieval, nua ch'igl ei vegniu scret historia da reformaziun muort il disput tier ils artechels da Glion, havein nus manteniu e mussein a Vus per quei motiv cun plascher nossa vischnaunca multifara per miez dil mund alpin fantastic dalla Surselva. Sesenti dacasa tier nus, nua che Vus mireis en fatschas rientas d'affons, entupeis persunas interessantas alla lavur, duront far sport ni el temps liber e vesis glieud cun bia experientscha da veta.